http://www.iceland.org/info
Öll börn sem fæðast á Akureyri verða heyrnarmæld frá og með næstu mánaðamótum. Þau bætast í hóp barna sem fæðast á Landspítalanum sem undanfarin tvö ár hafa verið heyrnarmæld nýfædd.
Herdís Guðbjartsdóttir, heyrnartæknir verður með kynningu á hjálpartækjum hjá Félagi heyrnarlausra föstudaginn 17. september kl. 13:30 til 15.
Heyrnarhjálp, í samvinnu við Heyrnar- og talmeinastöðina, býður til kaffispjalls þriðjudaginn 23. nóvember kl. 13:30 í húsnæði Heyrnarhjálpar að Langholtsvegi 111.
Guðrún Skúladóttir, heyrnarfræðingur, hefur umsjón með spjallinu. Farið verður yfir umhirðu heyrnartækja, hvað þarf að hreinsa og skipta um.
Ef þú notar heyrnartæki eða átt vandamenn sem það gera hvetjum við þig til að koma í kaffispjall til okkar. Við lofum kaffi og fróðleik og þú kemur með góða skapið með þér.
Heyrnar- og talmeinastöðin og Félagið Heyrnarhjálp
Tónmöskvi og rittúlkur á staðnum
HEYRN, HEYRNARMÆLINGAR OG FRÁVIK Í MÁLÞROSKA
Heyrnar- og talmeinastöðin býður hjúkrunarfræðingum heilsugæslustöðva upp á námskeið um heyrn, heyrnarmælingar og frávik í málþroska.
Námskeiðið er ætlað hjúkrunarfræðingum sem sjá um heyrnarmælingar á heilsugæslustöðvum og í skólum. Farið verður yfir hvernig eðlileg heyrn er, hvað heyrnarmælingin sýnir okkur og hvenær þarf að vísa áfram til frekari rannsókna.
Rædd verða helstu frávik í málþroska barna.
Námskeiðið er í boði á eftirfarandi dögum:
21. janúar, 18. febrúar og 17. mars 2011
Skráning er í síma 581 3855 frá kl. 8:00 – 16:00 alla virka daga og á netfanginu www.hti@hti.is
Verið velkomin,
Starfsfólk Heyrnar- og talmeinastöðvar Íslands
Vegna afar góðra undirtekta á námskeiðið um HEYRN, HEYRNARMÆLINGAR OG FRÁVIK Í MÁLÞROSKA fyrir hjúkrunarfræðinga heilsugæslustöðva höfum við ákveðið að bæta við einu námskeiði. Námskeiðið verður haldið 23. mars.
Námskeið fyrir kennara sem kenna heyrnarskertum börnum og aðra þá sem vilja fræðast um heyrnarskerðingu og afleiðingar hennar.
Námskeiðið verður haldið dagana 11. og 28. febrúar kl. 8:15 -12:30.
Farið verður í hvað heyrnarskerðing er, þarfir heyrnarskertra nemenda, afleiðingar hávaða og algengustu heyrnartæki og virkni þeirra. Einnig verður farið yfir FM búnað sem margir heyrnarskertir nemendur nota.
Fyrirlesarar eru heyrnarfræðingarnir Bryndís Guðmundsdóttir og Kristbjörg Pálsdóttir.
Skráning fer fram með tölvupósti á hti@hti.is eða í síma 581 3855. Skráningu lýkur 9. febrúar fyrir fyrra námskeiðið og 24. febrúar fyrir það síðara.
Með kveðju,
Starfsfólk Heyrnar- og talmeinastöðvarinnar
Guðrún Skúladóttir fjallar um kuðungsígræðslu. Hvað er kuðungsígræðsla? Hverjir geta farið í ígræðslu og hvaða árangri getur hún skilað?
Kaffispjallið er vettvangur fyrir heyrnarskerta og aðstandendur þeirra til að fræðast um ýmis málefni er varða heyrnarskerta. Ert þú með góða hugmynd eða finnst þér vanta fræðslu? Komdu í kaffi og finnum út hvort við getum ekki gert eitthvað saman!
Heyrnarhjálp
Styrkir til rannsókna vegna eyrnasuðs (tinnitus)
Liljusjóðurinn
Rannsóknar- og styrktarsjóður Lilju Guðrúnar Hannesdóttur
auglýsir til umsóknar styrki til rannsókna vegna eyrnasuðs (tinnitus).
Tilgangur sjóðsins er að styrkja rannsóknir á eyrnasuði. Tilgangur rannsókna skal vera sá að afla hverrar vitneskju sem hægt er til að komast að ástæðum þess að fólk geti þjáðst af eyrnasuði (tinnitus).
Umsóknarfrestur er til 18. apríl 2011.
Úthlutað verður úr sjóðnum á afmælisdegi Lilju Guðrúnar 24. maí 2010.
Umsóknareyðublöð má nálgast á heimasíðu sjóðsins http://www.liljusjodurinn.is eða hjá undirrituðum.
Hannes Petersen dósent; hpet@landspitali.is
Ingibjörg Hinriksdóttir; ingibjorg@hti.is
Kristín Ingólfsdóttir, rektor Háskóla Íslands og Guðrún Gísladóttir, framkvæmdastjóri Heyrnar- og talmeinastöðvar Íslands, hafa undirritað samning til að efla farsælt samstarf beggja, sem felst í að nýta sem best sérþekkingu, kunnáttu, efnivið og aðstöðu sem aðilarnir búa yfir.
Föstudaginn 29. apríl fékk Lubbi finnur málbein viðurkenningu Upplýsingar, félags bókasafns- og upplýsingafræða, sem 'Besta íslenska fræðibókin fyrir börn árið 2010' en bókin um Lubba er hugsuð til málörvunar og hljóðanáms fyrir börn á aldrinum tveggja til sjö ára. Höfundar bókarinnar, Þóra Másdóttir og Eyrún Ísfold Gísladóttir, eru báðar talmeinafræðingar sem hafa áralanga reynslu af talþjálfun barna en Þóra starfar einmitt um þessar mundir hér hjá Heyrnar- og talmeinastöð Íslands.
Bókin kom út hjá Máli og menningu/Forlaginu haustið 2009.
Stam – íhlutunarrannsókn á vegum Háskóla Íslands, Heyrnar- og talmeinastöðvar og Talþjálfunar Reykjavíkur.
Heyrnarfræðingar Heyrnar- og talmeinastöðvarinnar bjóða til kynningar og spjalls um heyrn, heyrnarskerðingu, heyrnartæki og önnur hjálpartæki fyrir heyrnarskerta. Námskeiðin eru haldin annan hvern þriðjudag kl. 13.30 á þriðju hæð í Valhöll, Háaleitisbraut 1, og lýkur um kl. 15:00.
Reynt verður að svara eftirfarandi spurningum:· Hvernig heyrum við?
· Hvað gerist þegar við missum heyrnina?
· Hvaða áhrif hefur heyrnartapið á daglegt líf?
· Hvað geta ættingar og vinir gert?
· Hvernig geta heyrnartæki hjálpað?
Fræðslan er fyrir alla sem eru farnir að tapa heyrn eða eiga aðstandanda/vin sem er heyrnarskertur.
Skráning fer fram í afgreiðslu Heyrnar- og talmeinastöðvarinnar, í síma 581 3855 eða á netfanginu www.hti@hti.is
Heyrnar- og talmeinastöðin býður til fyrirlestrar um heyrn og málþroska leikskólabarnafimmtudaginn 27. október í Valhöll, Háaleitisbraut 1, frá kl. 8:30 – 12.00.
Dagskrá
Nýburamælingar:-Tilgangur-Mæliaðferðir-Heyrnarskerðing greind – Hvað svo?-Nýburamælingar á Íslandi
Miðeyrnarvandamál:-Einkenni-Greining-Meðferð
Málþroski:-Þróun máls og tals-Helstu frávik í máli/tali-Úrræði
Fyrirlesarar eru Ingibjörg Hinriksdóttir, yfirlæknir og Hrafnhildur Halldórsdóttir, talmeinafræðingur
Heyrnar-og talmeinastöð gefur út nýtt efni.
Talmeinafræðingarnir Þóra Másdóttir og Hrafnhildur Halldórsdóttir hafa tekið saman orðalista sem inniheldur orð sem raðað er eftir málhljóðum. Um er að ræða 130 blaðsíðna hefti sem gagnast til dæmis í vinnu með börnum í leik- og grunnskóla hvort heldur sem unnið er með framburð, málþroska og/eða orðaforða. Orðalistarnir nýtast einnig í vinnu með fullorðnum einstaklingum sem þurfa að æfa framburð hljóða og orða.
Hljóðabelgur skiptist í sjö kafla; Stök málhljóð í framstöðu, innstöðu og bakstöðu. Samhljóðaklasa, bæði framstöðu-og innstöðuklasa. Lágmarkspör, sérhljóð, orð röðuð eftir orðalengd og að lokum nokkrar hljóðaþrautir.
Heimilt er að ljósrita listana.
Verðið er 4.500 krónur og hægt er að nálgast eintak á HTÍ
Mörg okkar hafa á einhvern hátt tengst fólki sem stamar, annaðhvort af afspurn eða þá að við þekkjum einhvern. Allir eru sammála um að stam er erfið taltruflun sem enginn vill vera með. Það er því engin furða þótt margir foreldrar hrökkvi illilega við ef þeir verða varir við að barnið þeirra tekur upp á því að stama. Eðlilega vilja foreldrar geta leitað sér hjálpar svo fljótt sem auðið er ef vera skyldi að það kæmi í veg fyrir langvarandi stam.
