Heyrnarskaði vegna hávaða er algengari en fólk gerir sér grein fyrir. Eldri karlmenn eru margir með skerta heyrn af völdum hávaða, enda var vitneskja um skaðleg áhrif hávaða á heyrn minni fyrir nokkrum áratugum. Nú vitum við betur en samt vex hávaðinn í umhverfi okkar með hverju ári. Jafnvel börn eru í mun meiri hávaða daglega, til dæmis leikskólum, en hollt getur talist.Eyra mannsins getur þolað allt að 85 dB jafngildis hávaða í 40 tíma á viku án þess að heyrnin skaðist. Hljóð upp á 140 dB getur hins vegar valdið heyrnarskaða samstundis! Á vinnustöðum þar sem hávaði fer yfir 85 dB á að nota heyrnarhlífar við vinnu og á flestum vinnustöðum er því fylgt fast eftir. Á sama tíma og við erum orðin mun meðvitaðri um hávaða á vinnustöðum hefur hávaði í umhverfi okkar aukist. Meðal annars með aukinni eign á iPod og MP-3 spilurum. Hugsum um heyrnina og um það hvað getur gerst þegar við hlustum á tónlist á miklum styrk. Eitt skipti nægir til þess að skaða heyrnina varanlega. Heyrnartæki eru góð en þau koma aldrei í staðinn fyrir óskaddaða heyrn.
